أبو شكر والانتخابات والخدّامة
|
قاسم بلشان التميمي
سألني جاري العزيز محمود وقال لي بعد ان حول الذال الى دال (استاد شدكول على الانتخابات الجاية) فقلت له عمي ابو محمود لم افهم سؤالك ؟، فابتسم وقال اقصد (هاي الانتخابات الراح تصير تفيدنه لو لا) فقلت له ماذا تقصد بالفائدة؟ قال اقصد يعني تتغير اموري ويصير عندي (دكان) ابيع بي بدل (البسطية) وارجع آخر اليوم للبيت واني مرتاح كهرباء موجودة و(مي) موجود واولادي راجعين من المدارس ومن كلياتهم بخير وسلامة وزوجتي (ام شكر) طابخة (خوش عشة) وما اسمع صوت طلقات ولا انفجارات وراتبي التقاعدي(اشوية يزودونه) ووو، فأجبته (اي عمي) كل هذا يصير واكثر بعد لكن بشرط، اجابني على الفور وما هو الشرط؟ قلت له ان تذهب الى صندوق الانتخابات وتنتخب الانسان الذي تشعر انه سوف يمثلك خير تمثيل وتنتخب القائمة التي تجدها قريبة منك .
فقال (ابوشكر)؟ (استاد يكولون الانتخابات ماتفيد) فقلت له (منو اليكول) فرد والله (استاد) ما ادري بس اسمع حجي من هذا النوع، فقلت له (ابو شكر انت خوش ازلمة) رد علي اشكرك (استاد هذا من اصلك الطيب) اجبته (رحم الله والديك) اجابني (ووالديك) قلت له اسمعني (ابوشكر) اجابني تفضل (مولانا)، قلت له هؤلاء الذين يتكلمون عن الانتخابات ويقولون انها لاتفيد وانها غير مجدية قاطعني ابو شكر (لا استاد مو مكدية) قلت له غير مجدية يعني (ما بيهه خير) قال نعم هو هذا (الحجي الي يحجون بيه) قلت له انت تعرف واحد منهم ،فقال لاوالله ياستاد ما اعرف ولاواحد من ذوله اليحجون، فقلت له جيد والناس المرشحين وصورهم موجودة في منطقتك تعرفهم، قال نعم اعرف اهواية منهم واكمل ابو شكر قوله (عندك مثلا واحد من المرشحين ابن جاري السابق) واكمل (الف رحمة على روح ابوه صدك ابن اوادم) فقلت له يعني تعرف واحد من المرشحين، فأجابني (صدك جذب) اعرف اهواية منهم وكلهم خوش اوادم استاد عشرة عمر تربطني بأهلهم) فقلت له عمي ابو شكر اذا تعرف المرشحين (لعد) شكو تسمع كلام بعض النكرات الذين مايريدون الانتخابات واكملت كلامي وقلت له (عمي ابو شكر) فردّ: عيون عمك تفضل احجي. قلت له المثل العراقي مو يكول(الشين التعرفة احسن من الخير التجهله) قال والله صحيح ثم قلت له وانت (دكول) اني اعرف اهواية من المرشحين هم واهلهم (خوش اوادم) يعني مو (شينين) فرد ابو شكر (اي والله صحيح استغفر الله ).ثم اكمل كلامه وقال (صدك اني ليش اسمع كلام بعض النكرات) ثم اكملت حديثي الى ابو شكر وقلت له (اذا تبقى تسمع كلام النكرات حتى البسطية ما تحافظ عليها) فرد ابو شكر (والله يا استاد كلامك كلش صحيح) وبعد ذلك ابتسم (ابو شكر) وقال عمي (اني ان شاءالله من تصير اموري زينة بعد الانتخابات الجاية واحوالي تتغيرراح اجيب خدّامة لأم شكر) !؟. فقلت له خدامة اسيوية لو افريقية؟ فضحك (ابوشكر) وقال (لا استاد اني مااقصد الخدامة الي في بالك والحجي بيناتنه اريد اتزوج واني كلت الزوجتي ام شكر اني دا اتزوج مو لإنه اريد زوجة ولكن اريد خدامة تساعدج بالبيت) !. واردف (شسوي لعد شلون اقنعها)!. فقلت له عمي ابو شكر اذا ما تنتخب (تره) ماكو خدامة، فضحك ابو شكر ضحكة عالية وقال (استاد) استر علي الله يستر عليك هو اني ام شكر ما كادر عليها، واكمل: والله اول واحد ينتخب اني ان شاءالله. فقلت له ان شاءالله.
|
|
